தமிழ் சினிமாவின் முன்னணி நடிகர்களில் ஒருவராக திகழ்பவர் நடிகர் அஜித் குமார். ரசிகர்களால் அன்புடன் “தல” என்று அழைக்கப்படும் அவர், தனது எளிமை, துணிச்சல் மற்றும் தனித்துவமான நடிப்பால் தனி ரசிகர் பட்டாளத்தை உருவாக்கியுள்ளார்.
சினிமாவைத் தாண்டியும் கார் பந்தயம் மற்றும் சாகச விளையாட்டுகளில் அதிக ஆர்வம் கொண்டவராக அஜித் குமார் அறியப்படுகிறார். பல்வேறு சர்வதேச கார் பந்தயங்களில் கலந்துகொண்ட அவர், அதில் பல ஆபத்தான அனுபவங்களையும் சந்தித்துள்ளார்.
அதில் முக்கியமாக மலேசியாவில் நடைபெற்ற பார்முலா கார் பந்தயப் பயிற்சியின் போது, கட்டுப்பாட்டை இழந்த கார் விபத்துக்குள்ளான சம்பவம் ரசிகர்களுக்கு பெரும் அதிர்ச்சியை ஏற்படுத்தியது. இந்த விபத்தில் அவர் காயமடைந்தாலும், மீண்டும் தன்னம்பிக்கையுடன் எழுந்து வந்தது பலரின் பாராட்டைப் பெற்றது.
இதுமட்டுமின்றி, சினிமா படப்பிடிப்புகள் மற்றும் கார் பந்தயங்களின் காரணமாக பல ஆண்டுகளாக முதுகெலும்பு மற்றும் கால் பகுதியில் கடுமையான காயங்களால் அவதிப்பட்டுள்ளார். பல்வேறு அறுவை சிகிச்சைகளையும் அவர் மேற்கொண்டுள்ளார்.
ஒரு கட்டத்தில் முதுகுத் தண்டுவடப் பிரச்சினையால் கடுமையான வலியுடன் வாழ்ந்ததாகவும் அவர் கூறியிருந்தார். மருத்துவர்கள் ஓய்வு எடுக்க அறிவுறுத்திய போதிலும், தொடர்ந்து படங்களில் நடித்து ஆபத்தான சண்டைக் காட்சிகளிலும் ஈடுபட்டார்.
குறிப்பாக வலிமை மற்றும் விடாமுயற்சி படங்களின் படப்பிடிப்பின்போது பைக் மற்றும் கார் விபத்துகளில் சிக்கிய வீடியோக்கள் சமூக வலைத்தளங்களில் வைரலாகி ரசிகர்களை பதற வைத்தது.
இந்நிலையில், சமீபத்தில் மீண்டும் கார் பந்தயத்தில் கலந்துகொண்டு தனது திறமையை நிரூபித்துள்ள அஜித் குமார், கார் பந்தயத்தின் மீதான தனது காதல் இன்னும் குறையவில்லை என்பதை வெளிப்படுத்தியுள்ளார். அவரது இந்த முயற்சி ரசிகர்களிடையே பெரும் வரவேற்பைப் பெற்றுள்ளது.
அதேநேரத்தில், அவரது அடுத்த திரைப்படம் குறித்த தகவல்களும் வெளியாகி வருகின்றன. தகவல்களின் படி, ஆதிக் ரவிச்சந்திரன் இயக்கத்தில் அஜித் குமார் தனது 64வது திரைப்படத்தில் நடிக்க உள்ளதாக கூறப்படுகிறது. இந்த படம் குட் பேட் அக்லி கூட்டணியை மீண்டும் இணைக்கவுள்ளதாக தகவல்கள் வெளியாகியுள்ளன.
மொத்தத்தில் அவர் சினிமாவையும் கார் ரேசிங்கையும் ஒன்றாகவே பார்க்கின்றார் அதற்காக பல ரிஸ்க்களையும் எடுத்துள்ளார். பலமுறை விபத்துகளை சந்தித்து உயிருக்கு போராடிய போதும் மனம் தளராமல் மீண்டும் துணிந்து நிற்கும் அஜித் குமாரை தற்போது பலரும் வியந்து பாராட்டி வருகின்றமை குறிப்பிடத்தக்கது.
.png)
.png)
Listen News!