தமிழ் சினிமாவில் நீண்ட நாட்களாக ரசிகர்கள் எதிர்பார்த்திருந்த திரைப்படங்களில் ஒன்றாக அமைந்தது நடிகர் சூர்யாவின் ‘கருப்பு’. ஆர்.ஜே. பாலாஜி இயக்கத்தில், ட்ரீம் வாரியர் பிக்சர்ஸ் தயாரிப்பில் உருவான இந்த திரைப்படம் கடந்த மாதம் 15ஆம் தேதி உலகம் முழுவதும் திரையரங்குகளில் வெளியானது.
வெளியான முதல் நாளிலிருந்தே ரசிகர்கள் மத்தியில் பெரும் வரவேற்பைப் பெற்ற இந்த படம், தற்போது பாக்ஸ் ஆபிஸில் வசூல் மழையை பொழிந்து வருகிறது.
நீதிமன்றங்களின் பின்னணியில் அநீதிகளுக்கு எதிராக களமிறங்கும் கருப்புசாமியின் போராட்டத்தை மையமாகக் கொண்டு உருவாக்கப்பட்டுள்ள இந்த திரைப்படம், ஆக்ஷன், உணர்வு, சமூகக் கருத்து மற்றும் விறுவிறுப்பான திரைக்கதை ஆகியவற்றின் கலவையாக ரசிகர்களை கவர்ந்துள்ளது.
சூர்யாவுக்கு ஜோடியாக நடிகை திரிஷா நடித்துள்ள இப்படத்தில் சுவாசிகா, இந்திரன்ஸ், யோகி பாபு, ஷிவாதா, சுப்ரீத் ரெட்டி, அனகா மாயா ரவி மற்றும் நட்டி நட்ராஜ் உள்ளிட்ட பலரும் முக்கிய கதாபாத்திரங்களில் நடித்துள்ளனர். இளம் இசையமைப்பாளர் சாய் அபயங்கர் இசையமைத்துள்ள பாடல்களும் பின்னணி இசையும் ரசிகர்களிடம் நல்ல வரவேற்பைப் பெற்று வருகின்றன.
திரைப்படம் வெளியானதிலிருந்து தமிழகம் முழுவதும் திரையரங்குகளில் ரசிகர்களின் ஆதரவு குறையாமல் தொடர்கிறது. பொதுவாக விடுமுறை நாட்களில் மட்டுமே பெரிய கூட்டம் காணப்படும் நிலையில், ‘கருப்பு’ திரைப்படத்திற்கு வேலை நாட்களிலும் ரசிகர்கள் தொடர்ந்து திரையரங்குகளுக்கு வருவது குறிப்பிடத்தக்க அம்சமாக மாறியுள்ளது.
இதன் விளைவாக, சூர்யாவின் திரைப்பயணத்தில் இதுவரை இல்லாத சாதனையை ‘கருப்பு’ பதிவு செய்துள்ளது. திரையரங்கு வசூல் மூலம் மட்டும் ரூ.300 கோடியை கடந்த முதல் சூர்யா திரைப்படமாக ‘கருப்பு’ உருவெடுத்துள்ளது. இதன் மூலம் நடிகர் சூர்யாவின் கேரியரில் புதிய வசூல் வரலாறு படைக்கப்பட்டுள்ளது.
தற்போதைய வசூல் நிலவரத்தைப் பார்க்கும்போது, படம் மிக விரைவில் ரூ.500 கோடி வசூல் சாதனையையும் எட்டும் என திரையுலக வட்டாரங்கள் கணித்துள்ளன. அப்படி நடந்தால், சூர்யாவின் சினிமா வாழ்க்கையில் அதிக வசூல் செய்த திரைப்படம் என்ற பெருமையையும் ‘கருப்பு’ கைப்பற்றும்.
இந்த வெற்றிக் கொண்டாட்டத்தின் மத்தியில் ரசிகர்களுக்கு மேலும் ஒரு விருந்தாக ‘கருப்பு’ திரைப்படத்தின் ‘காட் மோட்’ வீடியோ பாடலை படக்குழு அதிகாரப்பூர்வமாக வெளியிட்டுள்ளது. ஏற்கனவே ரசிகர்களிடையே பிரபலமான இந்த பாடல், தற்போது வீடியோ வடிவில் வெளியாகி சமூக வலைத்தளங்களில் வைரலாகி வருகிறது.
.png)
.png)
Listen News!